අලි අල්ලන ලේසිම ක්‍රමේ (හිනා වෙන්න කවියෙන්)

ඉතින් ඔයාලට කොහොම ද යාලුවනේ. ඔක්කොම හොඳින් ඇති කියලා හිතනවා. මම අද කියන්න යන්නෙ පුන්චිම පුංචි රස කතාවක් කවියෙන්. ඔයාලා අහලා ඇති අපේ ජන සාහිත්‍යයේ ඕන තරම් රස කතා තියෙනවා. සමහර ඒවා උපදේශ කතා , සමහරක් මිථ්‍යා කතා, සමහරක් විහිලු කතා, සමහර ඒවා තත් කාලීන සිද්ධි මත ගෙතුනු කතා. ඒ අතින් ගත්තම අපේ ජන සාහිත්‍යය කියන්නෙ හරිම පොහොසත් එකක්. ඉතින් ඒ අතරින් ගොඩක් අයගේ මතකයේ රැඳිච්ච කතා තමයි විහිළු කතා කියන්නේ. ඒ අතරින් අන්දරේ , කැකිල්ලෙ රජතුමා , කිරිහාමි, ගමරාල, කියන්නෙ ගොඩක්ම විහිලු කතා වලින් හදවත් දිනා ගත්ත ජන සාහිත්‍යයේ සුප්‍රසිද්ධ චරිත කිහිපයක්. මම අද කියන්න යන්නෙත් ඒ වගේ ජනසාහිත්‍යයෙන් ආපු විහිළු කතාවක් ගැන. එහෙත් මෙහි විශේෂත්වයක් තියෙනවා. මේ කතාවෙ චරිත නෑ. සිද්ධි දාමයක් විතරයි තියෙන්නෙ. ඒ වගේම මම එය ඉදිරිපත් කරන්නෙ කවියෙන්. අපි එහෙනම් බලමු අලි අල්ලන ලේසිම විදිහ මොකක්ද කියලා. එන්න හිනා වෙන්න.

රවමින් ඔරවමින් යයි ජීවන නදිය
ඇත්තට අපිට හිනැහෙන්නට කල් මදිය
එබැවින් මදහසක් දෙන්නට බැඳ පැදිය
සරලව කියන්නම් අලි අල්ලන විදිය

අලි කරදරේ රට පල්ලේ තැනින් තැන
ගොවියෝ බැරිම තැන ඉවසති මුවින් බැන
ඒ මේ කතා ඇසු විට මගෙ හිතින් පැන
ආවේ කතාවකි මා ඇසු කනින් කන

පල්ලෙන් උඩින් නොම කියවා කඩි මුඩිය
තේරුම් අරන් කියවනු අඩියෙන් අඩිය
අල්ලනු බැරිය නොහිතා අලියන් තඩිය
පලමුව සොයා ගනු මේ ටික අඩු වැඩිය

කඹයක් ගන්න හයියැති නොම වූ බාල
මී පැනි ඕන වෙයි කුප්පියකට කාල
ගලවන් යන තරම් බඩ බොකු කෑ වේල
ඕනැ ඇට ටිකක් කුඩු කර ජය පාල

ඔය ටික හොයා ගත්තොත් නොකියා බැරිය
ඊලඟ ටිකට ඕනෑ වෙන්නේ දිරිය
අලිමංකඩක් බලලා අලියන් පිරිය
දෙපසේ ගස් දෙකක් ඕනෑ වෙයි හරිය

එක කෙලවරක් එක ගසකට ගැට ලන්න
කඹයේ මැදින් ජයපාලම තවරන්න
මී පැණි ඉතිරි කොන හොඳ හැටි පොඟවන්න
අලියෙකු එන තුරා බලමින් සැඟවෙන්න

අලියා ඇවිත් මී පැණි කොන ගිල දාවී
නොදැනිම බෙහෙත ගැල්වූ හරියත් කාවී
බෙහෙතේ බලෙන් කඹයේ කොන බඩ යාවී
වසුරුත් සමඟ කඹ කොන එලියට ඒවී

ඔබගේ වාරෙ ආ බව දැන් දැන ගන්න
සැගවුනු තැනින් හෙමිහිට එලියට එන්න
කඹ කොන අරන් අලියට එය නොදැනෙන්න
අනික් ගසට කරලා එය ගැට ලන්න

කුකුලෙකු බාබකිව් කරනා සේම බොලේ
අලියා ඇඟ මැදින් හිර වී යාය කැලේ
මෙහි මුල් අයිති කරු හෙව්වා මමත් මලේ
ඌ නෑ නාසා ගොස් ඇත හින්දාම මොලේ

ඉතින් යාලුවනේ ඔයාලා මේ කතාව කලින් අහලා ඇති. ඒත් මම හිතනවා මේ විදිහට කවියෙන් ඇහුවෙ පලවෙනි වතාවට වෙන්න ඇති කියලා. කතාවක් නිකන් කියවනවට වඩා එයට කාව්‍ය රසය එකතු උනාම අමුතු ලස්සනක් තියෙනවා. මම හිතනවා ඔයාලා මේ කතාව රස විඳින්න ඇති කියලා. ඔයාලගේ මුහුණට පුංචි හරි හිනාවක් ආවා නම් මගේ මේ ලිපිය සාර්ථකයි කියලා මම හිතනවා. ආයෙත් දවසක මේ වගේ රසවත් ලිපියකින් හමුවෙනතුරු මම සමුගන්නවා. සුබ දවසක් ඔයාලා හැමෝටම.