ලයිසන් එකට කලින් මෙඩිකල් එක | 5% for SL Charity | Club5050

ඉස්සර ඉඳන් ම මගේ හිතේ තිබුණ ආසාවක් තමයි කාර් එකක් පදින එක. ඉතින් ඔක්කොටම කලින් ඩ්‍රයිවින් ලයිසන් එක ගන්න ඕනනේ. ඉතින් මේ දවස් ටිකේ ගෙදරට වෙලා ඉන්න එකේ ඒ වැඩ ටික කරගත්තොත් හොඳයි කියලා මට හිතුනා. @roshipeiris කාලයක් තිස්සේ මං එක්ක කිය කිය හිටපු නිසා මං එයාටත් කතා කරා ලයිසන් ගන්න යමු කියලා.

රියදුරු බලපත්‍රයක් ලබා ගන්න නම් අපිට අවශ්‍ය කරන දේවල් කිහිපයක් තියෙනවා. ඒවා තමයි පාස්පෝට් ප්‍රමාණයේ කලු සුදු චායාරූප 6ක්, උප්පැන්න සහතිකයේ මුල් පිටපත් 01ක්, ජාතික හැඳුනුම්පතේ පිටපත් 01ක් සහ වෛද්‍ය වාර්තාවක්. ඉතින් අපි ඊයේ මෙඩිකල් එක ගන්න ගියා. ගාල්ල වක්වැල්ල පාරේ තියෙන ජාතික ප්‍රවාහන ආයතනයෙන් තමයි මෙඩිකල් එක ගන්න ඕන.

ඉතින් අපි උදේ 10ට විතර ගාල්ලට ආවා. රෝෂි නම් ආවේ ටිකක් පරක්කු වෙලා. 🙊 ඉතින් එයත් ආවට පස්සෙ අපි දෙන්න පයින්ම ගියා. එතන හොයාගන්න අපි දෙන්නට එච්චර අමාරු උනේ නැහැ. අපි යනකොට ගොඩක් අය ඇවිත් හිටියා. අපි මුලින්ම කරේ ගිහින් අංකයක් ගත්ත එක. අපේ අංක 128, 129.

ඉතින් අපිට ටිකක් වෙලා වාඩි වෙලා ඉන්න උනා. ඔහොම ඉන්න අතරේ අපේ අංක කියලා කතා කරා. මුලින්ම අපේ උස,බර මැනලා පුංචි කොලයක සටහන් කරලා දුන්නා. ඊට පස්සෙ අපි ගියේ ලියාපදිංචි කරන තැනට. එත්නට යද්දී අනිවාර්යයෙන් අපේ ජාතික හැඳුනුම්පත අපි ගාව තියෙන්න ඕන. ලියාපදිංචි කටයුතු ඉවර උනාම අපි සල්ලි ගෙවන තැනට ගියා.

ඊට පස්සේ අපි ගියේ ලේ ගන්න තැනට. අතේ ඇඟිල්ලක් සිදුරු කරලා ලේ බිංඳු දෙක තුනක් ගත්තා වීදුරු කදාවකට. ඒ අපේ ලේ වර්ගෙ පරීක්ෂා කරන්න. කට්ටෙන් ඇඟිල්ලට ඇනපු වෙලාවේ තරු විසි උනා මට. 🥲

ඊට පස්සෙ අපි ගියා ඊලඟ තට්ටුවට. අපිට එතනදි පොඩි පොඩි ක්‍රියාකාරකම් ටිකක් කරන්න උනා අත, පය, ඇඟිලි නවන දිග අරින වගේ ඒවා. ඊට පස්සෙ අපේ පෙනීම බැලුවා. මං ටිකක් බයේ හිටියේ මගේ පෙනීම ගැන. වාසනාවට පෙන්නපු ඔක්කොම අකුරු ඉලක්කම් මට කියවන්න පුලුවන් උනා.

දැන් ඉතින් හරි. නම කියලා කතා කරනකම් අපි දෙන්න වාඩි වෙලා බලන් හිටියා. ටික වෙලාවකින් අපේ මෙඩිකල් අපේ අතට ලැබුණා. පැය දෙකක් යන්නත් කලින් අපේ වැඩේ කරගන්න ලැබුණා.

රෝෂි උදේට කාලත් නෑ කියපු නිසා අපේ ඊලඟ වැඩේ උනේ මොනව හරි කන එක. ඉතින් අපි එන ගමන් ජූස් බාර් එකකට ගිහින් බන් දෙකක් කාලා ෆලූඩා දෙකකුත් බිව්වා. දැන් හරි. 😋 ගෙදර යන්න තව ටික වෙලාවක් තිබුණ නිසා ගාල්ලෙ පාර්ක් එකෙත් ටිකක් ඇවිදලා අපි දෙන්න ගෙදර ගියා.