આજથી ખિસ્સા પર પડશે વધારે ભાર, ATMના પ્રતિ ટ્રાન્ઝેક્શન પર 21 રૂપિયા ચાર્જ
નવી દિલ્હી: ભારતીય રિઝર્વ બેંક (RBI) ના આદેશને પગલે, બેંકોએ નવા વર્ષના પ્રથમ દિવસે શનિવાર, 1 જાન્યુઆરી, 2022 થી ઓટોમેટેડ ટેલર મશીન (ATM) રોકડ વ્યવહારો અને અન્ય વ્યવહારો પર ચાર્જ વધાર્યો છે. આ ફી વધારો ટ્રાન્ઝેક્શનની નિર્ધારિત સંખ્યા કરતા વધુ ટ્રાન્ઝેક્શન કરવા બદલ કરવામાં આવ્યો છે. આમાં રોકડ અને અન્ય વ્યવહારો પણ સામેલ છે.
RBIની 10 જૂન, 2021ની સૂચના અનુસાર, 1 જાન્યુઆરી 2022થી બેંકો હવે ATM ટ્રાન્ઝેક્શન ચાર્જ તરીકે 20 રૂપિયાને બદલે 21 રૂપિયા વસૂલ કરી શકશે. જો કે, ગ્રાહકો તેમના બેંક એટીએમમાંથી દર મહિને પાંચ સુધી મફત વ્યવહારો (નાણાકીય અને બિન-નાણાકીય વ્યવહારો સહિત) કરી શકે છે. આ ફી માત્ર તેનાથી વધુના વ્યવહારો માટે જ વસૂલવામાં આવશે.
ગ્રાહકો અન્ય બેંકોના એટીએમમાંથી મફત વ્યવહારો (નાણાકીય અને બિન-નાણાકીય વ્યવહારો સહિત) પણ કરી શકે છે, પરંતુ તેની મર્યાદા પણ નક્કી કરવામાં આવી છે. મેટ્રો શહેરોમાં, ગ્રાહકો અન્ય બેંકના એટીએમમાંથી ત્રણ ટ્રાન્ઝેક્શન કરી શકે છે જ્યારે નોન-મેટ્રો શહેરોમાં, પાંચ વ્યવહારો કરી શકે છે.
અગાઉ ATM ટ્રાન્ઝેક્શન માટે ઇન્ટરચેન્જ ફીના માળખામાં છેલ્લો ફેરફાર ઓગસ્ટ 2012માં કરવામાં આવ્યો હતો, જ્યારે ગ્રાહકો દ્વારા ચૂકવવાપાત્ર ચાર્જમાં છેલ્લે ઓગસ્ટ 2014માં સુધારો કરવામાં આવ્યો હતો. બેંકો અથવા વ્હાઇટ-લેબલ એટીએમ ઓપરેટરો દ્વારા એટીએમ ઇન્સ્ટોલેશન અને એટીએમ જાળવણી ખર્ચમાં વધારો થવાને ટાંકીને આરબીઆઈએ આ ફેરફારોને 1 જાન્યુઆરી 2022 થી અમલમાં મૂકવાની સૂચના આપી છે.
