Puso Kong Magulo

Lisanin mo na ako - sigaw ng aking puso,
Ngunit tanging ikaw ang siyang nilalaman nito.
Lisanin mo na ako - kumpas ng aking mga kamay,
Pero bakit nais kitang maabot sa tuwing ika'y kumakaway.
Lisanin mo na ako - turo ng utak ko,
Ngunit parating ikaw - sa isip ko'y tumatakbo.

Iwanan mo na ako - habiling nais bitawan ng aking labi,
Ngunit sa iyong dampi - uhaw ko'y napapawi.
Iwanan mo na ako - sabi ng aking mga mata,
Pero bakit sa iyong paglayo luha ko'y lumalala.
Iwanan mo na ako - sambit ng pagod kong mga paa,
Ngunit kahit gaano kalayo kayang lakbayin, ikaw lang makasama.

Tigilan mo na ako - tibok ng pusong nagdurugo,
Pagod na ako sa iyong pagpaparamdam na 'di buo.
Tigilan mo na ako - bigkas ng pawis sa aking mukha,
Na sabay dumadaloy sa aking mga luha kapag ika'y naaalala.
Tigilan mo na ako - bulong ng sugatan kong mga balikat,
Sa tuwing ika'y umiiyak at wasak, ako ang nagpapa - angat.

Pagod na ako - huni ng nabibingi kong taenga,
Na palaging dinig ko mga salita mong puno ng bola.
Pagod na ako - iyak ng katawan kong puno ng galos,
Ngunit gumagaan - nawawala ang hapdi sa lambing ng iyong haplos.
Pagod na ako - ang tawag ng kaluluwa kong ginugulo mo.
Ako lang ba talaga ang nagmahal sa iyo ng buo?

Sana ay nagustuhan niyo ang pinakauna kong nailathalang tula .
Subaybayan niyo pa po ang iba kong ilalathala dito lang sa aking Steemit blog.
Maraming Salamat Po!

Image Taken from Deviantart

signing out 😊