Steem Sri Lanka Year-End Contest | Looking Back at 2021 | 5% to Sl Charity

ඔන්න ඉතින් @randulakoralage විසින් සංවිධානය කරලා තියෙන වෙනස්ම ආකාරයේ තරඟයක අවසාන දවසත් ඇවිල්ලා. මේ වගේ විශේෂ දෙයක් සංවිධානය කරපු එක ගැන ස්තුතිවන්ත වෙනගමන්ම මං මේ අවුරුද්ද ගැන මගේ කතාව පටන්ගන්නම්.

2021 කියන්නේ ඇත්තටම ගොඩක් දේවල් වෙච්ච අවුරුද්දක්. අවුරුද්ද පටන්ගද්දිම ඉස්සරහට කාලය කොහොම වෙයිද කියලා දෙගිඩියාවක් මේ ලෝකේ ඉන්න හැමෝටම වගේ තිබුනා කියලයි මටනම් හිතෙන්නේ. මං එහෙම කියන්න හේතුව තමයි ගෝලීය වසංගතයක් වෙලා තියෙන කොරෝනා ව්‍යසනය. මං උනත් මේ අවුරුද්ද පටන්ගත්තේ ලොකූ බලාපොරොත්තු ගොඩක් තියාගෙන නෙවෙයි. ඉතින් කොරෝනා වලටම යටවෙලා ඉන්නේ නැතුව ජීවිතය ඉස්සරහට අරන් යන්න මිනිස්සු පුරුදුවෙලා. ඒක මං දැකපු ඉතාමත් හොඳ ප්‍රවනතාවයක්.

මේ අවුරුද්ද මටනම් හොඳ දේවල් සහ නරක දේවල් කියන වර්ග දෙකෙන්ම පිරුණු අවුරුද්දක්. අපි කොච්චර කැමති උනත් අපිට හොඳ දේවල් විතරක්ම ලැබෙන්නේ නෑනේ. ඉතින් ඒ හින්දා හොඳ හෝ නරක වශයෙන් අපිට ලැබෙන ඕනිම දෙයක් ජීවිතේට අත්දැකීමක් කරගෙන ඉස්සරහට යන්න තමයි තියෙන්නේ. මේ අවුරුද්දේ මට උන නරකම දේ තමයි අප්පච්චිට අංශභාගය හැදුනු එක. ඉතින් ඒකත් එක්ක ජීවිතේ මාව හිරවෙන අවස්ථා වැඩි උනා. ඒ කියන්නේ එයා ගැන හැමවෙලාවෙම විශේෂ අවධානයක් දෙන්න ඕනි. අපි ගමනක් බිමනක් යන එක පවා සීමා කරන්න සිද්ධ උනා. මං කොහොමත් ඇවිදින්න ආස කෙනෙක්. ඒ උනාට දැන් ඒක හිතේ හැටියට කරන්න විදියක් නෑ. ජීවිතේ හැටි එහෙම තමයි. පුලුවන් දවස්වල ගිය ගමන්වල මතක එක්ක ඉන්න එකත් හිතට සතුටක්.

අපි හැමෝම ආසයිනේ වාහන වලට. මාත් එහෙම තමයි. ලොකු වටිනාකමක් තියෙන වාහනයක් ගන්න තරම් ලොකු වත්කමක් තවම මට නැහැ. ඒත් ඉතින් ජීවිතේ එක එක කාල වලට එන එක එක අසාවන්ට ඉඩදෙන්න ඕනි කියලයි මට හිතෙන්නේ. එහෙම නොකලොත් වයසට ගියාම අනේ මගේ ජීවිතේ හොඳම කාලෙ මට අර දේ කරන්න බැරි උනානේ කියලා දුක් වෙන්න තමයි වෙන්නේ. මං කියන්නේ වැරදි දේවල් වලට ඉඩදෙන්න ඕනි කියලනම් නෙවෙයි ඔන්න. ඒ වගේ මගේ තිබුණු ආසාවක් තමයි අලුතෙන් වාහනයක් ගන්න එක. මගේ තිබුණු වාහනය විකුනලා මාස දෙකකට වගේ පස්සේ මට වෙන වාහනයක් ගන්න පුළුවන්කමක් ලැබුනා. ඒක මං මේ අවුරුද්දේ ලබාගත්ත ජයග්‍රහණයක්. සමහරු ඇහුවා මේ වාහන ගණන් කාලෙ වාහන විකුනලා වෙන ඒවා වැඩි ගානකට ගන්න පිස්සුද කියලා. ඒත් ඒක මගේ ආසාවක්. තරුණ කාලෙ අපිට ලබාගන්න ඕනි දේවල් වයසට ගියාම ලැබුනට ඇත්තටම සතුටු වෙන්න බෑනේ නේද. මං හිතුවේ එහෙමයි.

වෘත්තීයමය වශයෙන් ගත්තමත් මට මේ අවුරුද්දේ සතුටු වෙන්න පුලුවන් කාරනා තියෙනවා. ඒ තමයි මට ලැබුණු උසස්වීම සහ වැටුප සැලකියයුතු ප්‍රතිශතයකින් ඉහල නැංවීම. ඉතින් ඒ කාරනා එක්ක බැලුවම මං 2020 අවුරුද්දට වඩා 2021 අවුරුද්දේ ලබලා තියෙන ප්‍රගතිය ගැන මට සතුටුයි. ඉතින් මේ දේවල් දිහා බැලුවම ඔයාලටත් තේරෙනවා ඇති මට මේ අවුරුද්ද හොඳ සහ නරක කියන දෙවිදියෙන්ම ප්‍රතිපල තිබුණු අවුරුද්දක් කියලා. හරියටම ඉස්සරහට මොනවා වෙයිද කියලා දෙගිඩියාවකින් පටන්ගත්ත අවුරුද්දක් උනත් ඒක සුභදායක විදියට හරවාගන්න එක තියෙන්නේ අපේ අතේම තමයි කියන දේ තමයි මේ අවුරුද්දේ මං ඉගෙනගත්ත ලොකුම පාඩම. සෑම අඳුරු වලාවකම රිදී රේඛාවක් තියෙනවා කියලා කතාවක් තියෙනවනේ. ඉතින් ඒක හොයාගන්න එක තමයි අපිට කරන්න තියෙන්නේ.

අවුරුද්දේ අන්තිම දවස්වල තමයි මගේ බිරිඳගේ උපන්දිනය තියෙන්නේ. ඉතින් ඒකත් හරිම සතුටුදායක විදියට සමරන්න මට පුලුවන් උනා. එයාගේ උපන්දිනය ලබන දවසේ රෑ 12ට අපේ ගෙදරට ඇවිල්ලා surprise birthday party එකක් දෙන්න තරම් හොඳ යාලුවෝ පිරිසක් ලැබුණු එක ගැනත් මං ගොඩක්ම සතුටු වෙනවා. ඒ වගේම එයාගේ උපන්දිනේට පස්සේ දවසේ එයාගේ අම්මයි තාත්තයි අපේ ගෙදර ආවා. මල්ලිත් දැන් මාසයක් විතර ඉඳලම ඉන්නේ අපේ ගෙදර. ඒ කියන්නේ අවුරුද්දේ අවසානයේ පවුලේ හැමෝටම එකට ඉන්න අවස්ථාවක් හම්බුනා. ඒක ගොඩක්ම සතුටු දවසක් උනා.

2021 අවුරුද්ද ගැන කතා කරනකොට අමතක කරන්නම බැරි දෙයක් තමයි steemit කියන්නේ. මේ අවුරුද්දේ මට ලැබුණු හොඳම තෑග්ග කියලා කීවොත් හරි. මං මේකට එන්නේ මේ අවුරුද්දේ පෙබරවාරි මාසේ අග. ඒ ඇවිල්ලා පටන්ගත්ත මගේ steemit ගමනේ මං අද වෙනකොට ඉන්න තැන ගැන මට සෑහීමකට පත්වෙන්න පුලුවන්. මේ අවුරුද්ද ඇතුලත Steem Sri Lanka එක්ක එකතුවෙලා Steem Sri Lanka Ice Breaking Comment Contest | Share the Best Food or Meal You Ever Enjoyed | Week - 04 කියන තරඟය සංවිධානය කිරීමට ලැබුණු එක මට විශාල සතුටක්. ඒ විතරක් නෙවෙයි මගේ අලුත් වාහනය ගන්න මදිපාඩු උන මුදලක් හොයාගන්නත් මට පුලුවන් උනේ මේ steemit කියන තෑග්ග හින්දම තමයි. Steem Sri Lanka එක්ක එකතුවෙලා #sslpromo යටතේ නිර්මාණය වෙච්ච ලස්සන ටීෂර්ට් එක මහලා අපේ අය අතර බෙදාහරින්න මට අවස්ථාව හිමිවුණේ ඔයාලා හැමෝම මගේ ගැන තිබ්බ විශ්වාසය හින්දා තමයි. ඒ ගැන හැමෝටම ස්තූතිවන්ත වෙන්න ඕනි. ඉදිරියටත් මේ වගේ දේවල් වලට මගේ දායකත්වය ලබාදීලා steemit එක්ක ලොකු ගමනක් යන්න තමයි මගේ බලාපොරොත්තුව.

තවත් ගොඩක් දේවල් ලියන්නනම් තියෙනවා. ඒත් ඒ හැමදේම මෙතන ලියන්න ගියොත් ඒවා කියවලාම ඔයාලට එපා වෙයි. ඒ හින්දා මේ අවුරුද්දේ වෙච්ච විශේෂ සිද්ධි ටිකක් තමයි මං ඔයාලට කීවෙ. ඉතින් මේ වගේ කතා අපි හැමෝටම තියෙනවනේ. ඒ හින්දා ඒවාට ඉඩක් දීලා මේ තරඟයෙන් තෑගි දිනාගන්න කියලා @chanchala, @templeflower සහ @chathux ට ආරාධනා කරනගමන් මගේ කතාව නවත්තනවා...