کچھ دکھ ایسے ہوتے ہیں جو لفظوں میں بیان نہیں ہوتے

کچھ دکھ ایسے ہوتے ہیں جو لفظوں میں بیان نہیں ہوتے، وہ خاموشی میں پلتے ہیں اور دل کے اندر آہستہ آہستہ اپنی جگہ بنا لیتے ہیں۔ انسان بظاہر ہنستا رہتا ہے، لوگوں میں گھرا رہتا ہے، مگر اس کے اندر ایک جنگ جاری ہوتی ہے۔ وہ جنگ غم اور درج کے بیچ نہیں، بلکہ خیال اور حقیقت کے درمیان ہوتی ہے۔ خیال وہ جو ہم نے اپنے دل میں بسا رکھا ہوتا ہے، اور حقیقت وہ جو ہمیں بار بار توڑ کر سامنے کھڑی ہو جاتی ہے۔

اکثر ہم کسی شخص، کسی لمحے یا کسی خواب کو اپنے خیال میں اتنا بڑا بنا لیتے ہیں کہ وہ ہماری حقیقت پر حاوی ہو جاتا ہے۔ ہم اس کے بغیر زندگی کا تصور ہی نہیں کر پاتے، مگر وقت ہمیں یہ سکھاتا ہے کہ حقیقت اپنی ضد پر قائم رہتی ہے۔ وہ ہمیں بتاتی ہے کہ جو ہمارا نہیں تھا، اسے اپنا سمجھ لینا خود سے بے وفائی کے مترادف ہے۔

یہ دکھ اس وقت اور گہرا ہو جاتا ہے جب انسان سمجھ جاتا ہے کہ وہ جس سہارے کو مضبوط سمجھ رہا تھا، وہ دراصل محض ایک وہم تھا۔ پھر نہ شکوہ باقی رہتا ہے نہ شکایت، بس ایک خاموش قبولیت دل میں اتر جاتی ہے۔ یہی قبولیت انسان کو آہستہ آہستہ مضبوط بناتی ہے، اسے یہ سکھاتی ہے کہ ہر خیال حقیقت نہیں بنتا، اور ہر حقیقت ہمارے خیال کے مطابق نہیں ہوتی۔

زندگی شاید اسی کا نام ہے کہ ہم اپنے خیالوں کو حقیقت کے آئینے میں دیکھنا سیکھ جائیں۔ جو ٹوٹ جائے، اسے چھوڑ دینا سیکھ لیں، اور جو باقی رہ جائے، اسی میں سکون تلاش کریں۔ کیونکہ اصل سکون اسی لمحے آتا ہے جب انسان اپنے دکھ کو مان لیتا ہے، اور حقیقت کو قبول کر لیتا ہے۔