HABA PEU INGAT

Source image

Seulamat malam rakan rakan loen nyang tuha beuseureuta nyang tuha. Nibak malam nyoe acie loen tuleh ulang ca'e nyan loen kutep bak padum pasum böh situih internet. Kadang na manfaat keu kawoem mandum. Meuseu na rakan rakan nyang tem translate keu dalam basa indonesia atawa basa inggreh silahkan. Tapi meuseu ca'e di miyup hanjeut ta translate.. sawwub meuseu salah ta tuleh salah makna. Laen muphom. He he... nyoe cuma haba peu ingat wahee rakan rakan loen nyang bak blog steemit..

Watèe ka malam ka peungeuh buleuen.
Nyo watèe ujeuen leupie bukon lé.
Nyoe pat na pantôn bak lôn peujangeun.
Ci neu peureumeun geulantoe Caé.

Kayèe sibak ramphak that dheuen.
Bungöng di leuen hudép saré.
Buet nyang karôt bèk peureumeun.
Nyang kheun meukheun bèk tapiké.

Meunyo tanyoe jak u dalam rimba.
Beukai beutaba tanyoe peuhasé.
Meunyo beut teuh gèt deungon Syédara.
Ukhuwah teubina han meupaké.

Yôh goh lom tayoe koh ôn meuriya.
Purieh beusigra beuta peuhasé.
Yôh masa goh lom tanyoe keurija.
Rugoe ngon laba beuna tapiké.

Yôh goh lom tanyoe tajak u paya.
Awai seudia nyan bijèh padé.
Yôh goh teulanjô peue keurija.
Bak Ureueng Tuha tanyoe tanyöng kré.

Aneuk glueh agam di dalam rimba.
Di Aneuk buya bak iku tubé.
Beurang kapeue buet peudoman beuna.
Ngat teupat banja han karôt akhé.

Di langèt manyang na bintang kala.
Όh malam jula cahya hana lé.
Yôh mantong kukôh tubôh anggota.
Ingat keu tuha beuna tapiké.

Geupula bayam dalam blang raya.
Tasiram hana ban mandum maté.
Nyo hana sunggôh yôh masa muda.
Όh watèe tuha susah bukon lé.

Didalam la ôt eungkôt meudôda.
Didalam paya teumeugom bacé.
Seunang ta udép meunyo sép harta.
Dak tan keurija tapajôh wasé.

Gunöng seulawah meugah na dua.
Nyang saboh Dara cidah meu uké.
Sunggôh ‘Ibadat Syufa’at teuka.
Sunggôh keurija seunang ׳oh akhé.

Reudôk lam uteuen ujeuen pih teuka
Lam krueng meukapa cabeueng meuranté
Bèk that peureumeun reun mareun dônya
Tanyoe ji daya rôh lam buet jahé

Tajak usabang jeumeurang kuala.
Rot lhôk krueng raya ék jalô kawé.
Meunyo tagalak bak buet nyang beuna
Seunang ׳oh lusa di uroe pagé

Jalan Meulabôh tumbôh u-tripa
Jalan Keumala tumbôh u-tangsé
Peue nyang tapubuet beujeuet takira
Rugoe ngon laba awai tapiké

Di bate tutông semantông tapa
Di guha naga jiduek uleue glé
Peue nyang tapubuet beujeuet meuguna
Bèk sia sia rugoe ׳oh akhé

Ranup kunèng ôn di keubôn yahwa
Nyang tuha-tuha lurôh bak tangké
Ètnoe keuh pantôn bak lôn Syédara.
Jeuet neupeuguna simpan lam haté

Saleum
@my451r