සරෝජා

source

සරෝජා චිත්‍රපටය තිරගතවන්නේ 2000 වසරේ දී. ළමයින් කේන්ද්‍ර කරගෙන ඔවුන් ප්‍රධාන චරිත සඳහා භාවිතා කර ඒ ඔස්සේ වැඩිහිටියන් ඇමතීමක් මෙම චිත්‍රපටයෙන් සිද්ධ වෙනවා. මෙම චිත්‍රපටය මෙරට ජනවාර්ගික අරගලයේ සුලභ පැතිකඩ එක්ක කේන්ද්‍රීයව බැඳෙනවා. මේ අගනා නිර්මාණය සිනමාවේ දී සෝමරත්න දිසානායකයන්ගේ නිර්මාණයක්. මේ චිත්‍රපටය ට මර්වින් නඩේෂන්, නිත්‍යාවනී කන්දසාමි, ප්‍රමුදි කරුණාරත්න, ජනක කුඹුකගේ ආදී නළු නිළියන් රංගනයෙන් දායක වෙලා තියෙනවා. සරෝජා චිත්‍රපටිය ආරම්භ වෙන්නේ යුද හමුදාව සහ එල්.ටී.ටී.ඊ ත්‍රස්තවාදීන් අතර ඇති වන මාරාන්තික සටනක දර්ශනයක් පෙන්වමින්. මේ විදියට තිරයේ යුද්ධය පෙන්නද්දී ඉන් පසුව අවධානය යොමු වෙන්නේ සුන්දරම් සහ ඔහුගේ සත් හැවිරිදි කුඩා දියණිය වන සරෝජා වෙතයි. සුන්දරම් කියන්නේ එල්.ටී.ටී.ඊ යට බලහත්කාරයෙන් බඳවා ගත්ත පුද්ගලයෙක්. ඔහු ත්‍රස්තවාදී කදවුරකින් පලා යද්දි වෙඩි ප්‍රහාරයකට ලක්වෙනවා. සුන්දරන්ගේ බිරිඳ සහ පුතා එහි වෙඩි ප්‍රහාරයෙන් මිය යනවා. එනිසාම ඔහු සහ සරෝජා අසරණයෝ වෙනවා. මේ තත්ත්වයත් එක්ක ඔවුන් අනාරක්ෂිත වනාන්තරය තරණය කරලා සිංහල මායිම් ගම්මානයක් ළඟට එනවා. ඔවුන් දෙදෙනාගේම මුහුණුවල ශෝකය හුදෙකලාව භීතිය සහ කුතුහලය මුසු දහසක් හැඟීම් සටහන්ව තියෙනවා. තවත් විටෙක ඔවුන්ට ඒ සියළුම හැඟීම් පරාද කරල කුසගින්න නැගී එනවා. මේ විදියට දිගටම රැඳී ඉන්න බැරි ඔහුගේ එකම අරමුණ තමාගේ කෙසේ වෙතත් තම දියණියගේ ජීවිතය බේරා ගැනීමයි. මේ වෙද්දී සුන්දරමට ඔහුගේ ජීවිතය දෙපැත්තකින් බේරා ගන්න සිද්ද වෙලා තියෙනවා. ඒ එල්.ටී.ටී.ඊ ත්‍රස්තවාදීන්ගෙන් සහ සිංහල මිනිස්සුන්ගෙන්.

source

මේ අතරේ සිංහල මායිම් ගම ළඟ තියෙන වනරොදේ කුඩා දැරියක් සෙල්ලම් කර කර ඉන්නව පෙන්නනවා. ඇය වරුනි. සුන්දරම මේ දැරියව දකිනවා. ඔහු සරෝජාව පිළිසරණ පතා වරුණි ළඟට යවනවා. මේ කුඩා ළමයි දෙන්නා යාළුවො බවට පත් වෙනවා. වරුනි ගේ සැලසුමකට අනුව සුන්දරම් සහ සරෝජාට වරුනිගේ පියාගේ රැකවරණය ලැබෙනවා. සරෝජාට වරුනිගේ ගෙදර නවාතැන්ද ලැබෙනවා. වෙඩි වැදිලා ඉන්න සුන්දරම් රෝහල් ගත කරනවා. වරුණිගේ පියා වන පුංචි බන්ඩා සිංහල ගුරුවරයෙක්. ඔහු ගමේ පරමා දර්ශක චරිතයක්. මේ අතර සුන්දරම් ගැන ගම පුරාම විවිධ කටකතා පැතිරෙනවා. වරුනිගේ තාත්තා සුන්දර ම ආරක්ෂා කිරීම නිසා ඒකට එරෙහි වුණු ගම්වැසියන් සහ රජයේ ආරක්ෂක අංශවලින් ඔවුන්ගේ පවුලට විවිධ බලපෑම් එල්ල වෙනවා. මේ සියලු බාධක හමුවේ වරුනි සහ සරෝජා තව තවත් හොඳ යාළුවන් බවට පත් වෙනවා. ජාති කුල ආගම් භේද ඔවුන් දෙන්නාට අදාළ නෑ . ඊට පස්සේ දමිළ ත්‍රස්තවාදියෙක් කියලා සැක කරල සුන්දරම අත්අඩංගුවට ගන්නවා. ඒ වගේ කෙනෙක්ට ආරක්ෂාව සැපයුවා කියන චෝදනාවත් පුංචි බණ්ඩාට එල්ල වෙනවා. ඒ චෝදනාවලට පැහැදිලි සාක්ෂි නැති වීම නිසා ඔවුන් නිදහස් වෙනවා. මේ සිද්ධිය නිසා පුංචි බණ්ඩාගේ පවුල ගම්වැසියන්ගේ චෝදනාව අවලාද වලට ලක් වෙනවා. පුංචි බණ්ඩාගේ පාසලේ කටයුතුවලට ද මේ නිසා බාධා එල්ල වෙනවා. මේ හේතුව නිසා පුංචි බණ්ඩා ඇතුළු පවුලේ අය වෙනත් ප්‍රදේශයක පදිංචියට යන්න සැලසුම් කරන අතරේ සුන්දර ම් එල්.ටී.ටී.ඊ ත්‍රස්තවාදීන්ගේ වෙඩි ප්‍රහාරයකින් මරණයට පත් වෙනවා. තමන්ගේ පිළිසරණට හිටි එකම කෙනාත් අහිමිවීම නිසා ගොඩක් අසරණ වෙලා ඉන්න සරෝජාට පුංචි බණ්ඩාගේ පවුලේ සෙනෙහස ලැබෙනවා. ඔවුන් ඇයව පවුලේම කෙනෙක් විදියට හදා වඩා ගන්නවා. මේ චිත්‍රපටිය අවසන් වෙන්නෙ මේ විදියට. මේ චිත්‍රපටය මිනිසුන් අතර ජනප්‍රිය වීමට එක හේතුවක් වෙන්නේ චිත්‍රපටියේ තියෙන සංවේදී බව. පුංචි බණ්ඩාගේ මිනිස්කම, දෙපැත්තකින්ම වැරදිකරුවෙක් වෙලා ඉන්න සුන්දරම් ගේ දුක, සරෝජා සහ වරුණිගේ මිතුදම වගේ සංවේදී සිදුවීම් ඒකට ගොඩක් බලපාලා තියෙනවා. මේ වගේ තවත් චිත්‍රපටයකින් අපි ඉක්මනටම හම්බවෙමු.